Ymbweru Bro

Eisteddfod Ceredigion 2021: Beth fydd ei gwaddol?

Prosiect Fory fu’n annog y Cardis i gynllunio sut gall ymweliad yr ŵyl wneud gwahaniaeth i’w bro

Lowri Jones
gan Lowri Jones
RAY TYLER IMAGES (CC BY 2.0)

Mae arweinwyr Pwyllgorau Cronfa Leol Eisteddfod Ceredigion wedi dod ynghyd i gynllunio sut gall ymweliad yr ŵyl genedlaethol adael gwaddol yn eu bro.

Gyda’r gobaith yn dal ynghyn y bydd Ceredigion yn fwrlwm o weithgarwch fis Awst nesa, daeth criw brwd o bob cwr o’r sir ynghyd ar Zoom i gymryd rhan mewn sesiwn dan arweiniad Prosiect Fory.

Yn y sesiwn, cafodd pawb eu hannog i feddwl sut y gallwn ni ddefnyddio’r bwlch anarferol yma o amser cyn wythnos yr Eisteddfod i adnabod anghenion ein cymdogaethau, a datblygu prosiectau lleol-iawn i ateb yr anghenion hynny.

Gyda’r pwysau i godi arian ar ben; codi hwyl, codi brwdfrydedd dros y Gymraeg a chodi’r uchelgais i wneud gwahaniaeth go iawn i’n bro yw’r nod. I fuddsoddi yn y dyfodol.

Cynhaliwyd sesiwn enghreifftiol gyda’r arweinwyr ar nos Lun 9 Tachwedd – rhannwyd patrwm o gwestiynau y gall bawb eu dilyn gyda’u criw lleol nhw. Gan ddechrau gydag adnabod yr asedau rydym yn adeiladu arnynt, aed ymlaen i drafod y pethau heriol mewn cymdeithas, cyn meddwl am syniadau am brosiectau i’w cynnal.

Dyma syniad o sut i gynnal sesiwn o’r fath yn eich ardal chi: 

 

Patrwm sesiwn ‘Gwaddoli-i-fuddsoddi’

I ddechrau, i annog pawb i feddwl beth yw ‘gwneud gwahaniaeth’, gallech holi:

  1. Beth yw gwaddoli?
  2. Beth yw buddsoddi?

Wrth adnabod eleni fel cyfle, oherwydd bod gennym amser anarferol cyn yr Eisteddfod, yna gallwch holi’r 3 prif gwestiwn, yn y drefn yma:

  1. PETHAU I ADEILADU ARNYNT – Beth ry’n ni eisoes wedi’i gyflawni fel pwyllgor? A beth yw’r asedau neu sgiliau sydd wedi ein galluogi i wneud hynny?
  2. HERIAU – Beth sy’n profi’n anodd (i ni fel Pwyllgor a hefyd fel cymdogaeth)?
  3. SYNIADAU – Sut allwn ni adeiladu ar ein cryfderau i oresgyn rhai o’r heriau? H.y. i waddoli-i-fuddsoddi

 

Cynhaliwyd y sesiwn gan Prosiect Fory mewn cydweithrediad â Phwyllgor Gwaith Eisteddfod Ceredigion – ac fe wnaeth y syniad gwreiddiol ddeillio o un o sgyrsiau cychwynnol Prosiect Fory yn yr haf.

I ddysgu mwy am sut i gynnal sesiwn ‘gwaddoli-i-fuddsoddi’, cysylltwch â Lowri ar lowrijones@golwg.com.

 

Pwy yw Prosiect Fory?

Ni yw Prosiect Fory – bawb sydd am fod yn rhan o’r symudiad tuag at y dyfodol.

Mae’r fenter yn cael ei harwain gan bartneriaeth rhwng Radio Beca a Bro360. Nod y ddau yw rhoi’r grym i bobol siapio cymdeithas trwy ysgogi trafodaeth am syniadau, a galluogi darlledu’r syniadau hynny er mwyn eu rhannu’n eang.

Digwyddiadau