gan
Lowri Jones
Mae modd i unrhyw berson lleol sydd wedi creu cyfrif ar eu gwefan fro greu drafft o stori. Fel criw o olygyddion lleol, chi sydd â’r grym cyffrous o bwyso’r botwm Cyhoeddi!
Chi, hefyd, sy’n gallu troi stori arferol yn stori dda – dyma rai cynghorion ar sut mae bod yn olygydd effeithiol…
Golygydd syml – gwneud bywyd yn syml!
Ewch i’r stori trwy’r ebost, a dewis y botwm ‘golygydd syml’. Mae golygu yn y ‘pen blaen’ fel hyn yn ffordd well o olygu stori gafodd ei chreu yn wreiddiol yn y pen blaen gan y cyfrannwr.
Dyma’r lle gorau i addasu lluniau. Gallwch newid trefn lluniau yma, ac felly dewis llun gwahanol yn brif lun os oes angen. Cliciwch ar y lluniau i newid pa ran o’r llun sy’n ymddangos ac addasu’r capsiwn.
Tynnu sylw o’r cychwyn cyntaf
Wrth ddarllen ar sgrîn ffôn, dim ond 3 eiliad mae pobol yn aros cyn penderfynu ydyn nhw am ddarllen mlaen neu symud i’r peth nesaf.
Gallwch chi fel golygydd helpu i hawlio sylw’r darllenydd, trwy roi eich sylw ar ran pwysicaf y stori, sef y dechrau.
- Pennawd – Mae angen i hwn ddweud yn glir beth yw’r stori a bachu sylw’r gynulleidfa. Peidiwch â cheisio bod yn rhy glyfar. Peidiwch, chwaith, â bod ofn newid y pennawd i roi bywyd iddo. Weithiau gall ychwanegu berf wneud byd o wahaniaeth.
- Crynodeb – Dyma’r frawddeg fach sy’n ymddangos dan y pennawd ar hafan eich gwefan fro. Newidiwch hwn os oes modd cynnig manylion ychwanegol am y stori yma.
- Y frawddeg neu ddwy gyntaf – mae angen darn mwyaf trawiadol y stori yn y fan yma. Byddai “Bydd pwll nofio’r dref yn cau yn y gwanwyn” yn frawddeg gyntaf well na “Bu’r Cyngor Trefn yn cyfarfod nos Fercher 6 Rhagfyr”, er enghraifft.
Cywiro a newid trefn testun
Wrth olygu’r testun, gallwch ddefnyddio’r botwm Cysill i’ch helpu i weld teipos, a’r botwm to bach i’ch helpu i osod toeon sydd ar goll.
Mae’r botwm ‘dolen’ yn handi – os oes rhywun eisiau rhannu dolen i weld arall, uwcholeuwch y testun a chopïo’r URL mewn fan hyn, bydd yn edrych yn daclusach na dolen hir yng nghanol y testun.
Cywirwch gamgymeriadau, ond mae’n siŵr y byddwch eisiau cadw’r dafodiaith – cofiwch mai pobol leol yw’r gynulleidfa hefyd.
Bydd llawer o ddarllenwyr yn darllen ar sgrîn fach y ffôn, felly rhannwch y stori’n baragraffau bach (un neu ddwy frawddeg ar y mwyaf) er mwyn helpu’r llygad i ddarllen ymlaen.
Peidiwch â bod ofn newid trefn y stori. Chi yw’r golygydd, a’ch swydd chi yw meddwl am y darllennydd – beth fyddai’r ffordd fwyaf diddorol i gyflwyno’r stori iddyn nhw?
A thorrwch unrhyw jargon allan, a byddwch yn gryno!
Os am olygu ym mhen cefn WordPress – ble mae popeth?
Byddwch chi, fel pawb arall, yn sgwennu eich straeon gwreiddiol yng ngwedd syml y gwefannau bro – trwy fynd i’r botwm Creu > Stori.
Ond pan fyddwch yn golygu stori rhywun arall, byddwch yn dilyn y neges ebost i ben cefn WordPress, sy’n cynnig ambell opsiwn ychwanegol i chi fel golygyddion.
Dyma’r prif bethau y byddwch eu hangen yn WordPress:
- mae straeon eich gwefan fro i gyd dan y tab ‘Cofnodion’ (lawr yr ochr chwith)
- bydd straeon sydd angen eu golygu’n ymddangos ’dan ystyriaeth’
- gallwch addasu’r testun yn y prif flwch, y pennawd a’r crynodeb
- methu gweld ble mae’r crynodeb? Sgroliwch lawr, bydd o dan y prif focs testun os ydych ar gyfrifiadur; neu ar y gwaelod un wrth sgrolio ar sgrîn ffôn
- cliciwch ar y prif lun (delwedd nodwedd) i weld oes angen golygu capsiwn
- NEWYDD: dewiswch pa gategori sy’n fwyaf addas i’ch stori, e.e. chwaraeon, hanes, newyddion
- gofalwch i beidio â newid y llinell enw, mae angen i hwnnw barhau i ddangos enw’r person grëodd y stori
- eich ffrind gorau yw’r botwm ‘rhagolwg’ – defnyddiwch hwn i wirio sut bydd y stori’n edrych cyn…
- pwyso’r botwm ‘cyhoeddi’!
Pwysig!
Cofiwch mai dim ond wrth olygu stori rhywun arall y dylsech fynd i ben cefn WordPress.
Er mwyn llwytho lluniau a fideos yn llwyddiannus mewn ffordd sy’n cadw at reolau hawlfraint, bydd angen i chi greu unrhyw straeon gwreiddiol eich hunain trwy’r pen blaen, sef dilyn y botwm Creu > Stori ar dop y sgrîn.