gan
Lowri Jones
Mae nifer o ardaloedd newydd wedi dangos diddordeb mewn creu gwefannau bro ac ymuno â rhwydwaith Bro360.
Er mwyn darganfod y potensial, mae holiadur ar-lein wedi’i lansio i holi barn cymunedau ledled Cymru.
Os bydd yr ymateb yn ffafriol, fe fydd yn hwb fawr i’r ymgyrch i gael cefnogaeth ariannol i sefydlu rhwydwaith cenedlaethol.
Dair blynedd a hanner ers dechrau’r prosiect o dan adain cwmni Golwg, mae yna wyth gwefan fro wedi’u sefydlu yn Arfon a gogledd Ceredigion… ac mae yna adroddiad newydd yn dangos bod brwdfrydedd mawr dros wefannau tebyg yn ne Ceredigion hefyd.
Fe lwyddodd yr wyth gwefan i barhau’n fyw ac yn fywiog trwy gyfnod y pandemig ac fe roddodd gwefan Bro360 gartref i fersiynau digidol o 37 o bapurau bro o bob cornel o’r wlad.
Wrth i’r prosiect peilot ddod i ben ddiwedd mis Mawrth, yr her fawr newydd yw dod o hyd i arian i gefnogi’r fenter, sy’n bartneriaeth rhwng y gwefannau bro a gwefan newyddion genedlaethol golwg360.
“Mae cael cefnogaeth i’r fenter yn allweddol i gynnal y gwaith mawr sydd wedi’i wneud eisoes ac i wireddu’r breuddwyd o gael rhwydwaith o wefannau bro ar hyd a lled Cymru,”
meddai Owain Schiavone, Cyfarwyddwr Bro360.
“Fe ddangosodd y gwefannau bro eu bod yn fwy na gwefannau newyddion; maen nhw hefyd yn tynnu cymdogaethau at ei gilydd ac yn hybu gweithgarwch Cymraeg y cymunedau – elfen hanfodol wrth anelu am filiwn o siaradwyr.”
A hoffech chi ddatblygu gwefan fro yn eich cymuned?
Llenwch ein holiadur byr heddiw.
Mae’n gyfle unigryw i wneud gwahaniaeth i’ch bro.