gan
Cadi Dafydd
Sut fyddwch chi’n cofio 2020?
Blwyddyn heb gyfarfodydd, eisteddfodau, sioeau, na gigs i’n diddanu? Efallai wir.
Cymdeithas yn dod i stop yn sydyn, a dim i’w ddweud wrth y dyn drws nesa’ tu hwnt i “diwrnod braf, ‘dydi”? O bosib.
Blwyddyn hesb, heb fawr ddim i’w drafod, dathlu na’i gofnodi? Nid o reidrwydd.
Dros y saith mis dwytha’ mae cyfranogwyr Bro360 wedi bod wrthi’n ddiwyd yn creu deunydd amrywiol a diddorol, gan brofi bod posib creu hyd yn oed pan fo’r byd o’n cwmpas yn arafu.
Ar y 7 gwefan – BroAber360, Clonc360, BroWyddfa360, Caernarfon360, DyffrynNantlle360, Caron360 ac Ogwen360 – mae unigolion a chymdeithasau wedi mynd ati i greu a sgwennu straeon o bob math.
Dyma ddetholiad o’r straeon hynny…
1. Codi arian
Dros y Cyfnodau Clo mae nifer fawr ohonom wedi codi arian at elusen – anodd fyddai dod o hyd i unrhyw un na redodd 5K na bwyta ŵy amrwd cyn cyfrannu’n hael i’r GIG!
Bu nifer o gyfranogwyr y gwefannau bro yn ymgymryd â heriau, gyda chlybiau pêl-droed yn rhedeg am filltiroedd a milltiroedd, plant yn chwarae gemau cyfrifiadurol am 12 awr ar y tro, ac eraill yn cerdded eu bro i godi arian.
A bu’r gwefannau bro yn fan perffaith i rannu dolenni Just Giving ac ati gyda’u stori, i’w gwneud hi’n haws i bobol gefnogi’r achos.
Llwyddiant Ymgyrch Elusennol CPD Waunfawr
Diweddariad ar ymgyrch Clwb Pêl-droed Waunfawr i godi arian ar gyfer elusen Awyr Las.
Gemathon Iestyn a’i frodyr er budd Kids Cancer Charity
Mae mis Medi yn fis codi ymwybyddiaeth o ganser mewn plant a bydd Siôn, Iestyn, Mabon ac Owain yn cynnal gemathon i godi arian i Kids Cancer Charity.
Trek 26 milltir lleol er mwyn Cymdeithas Alzheimer’s
Wendy a Carol yn codi arian at achos sy’n agos iawn i’w calonnau.
2. Busnesau’n addasu, blaguro ac arloesi
Bu’r cyfnod clo yn un anodd iawn i fusnesau, ond llwyddodd cwmnïau bychain i addasu ac arloesi er gwaetha’r anawsterau.
Dyfnhaodd gwerthfawrogiad cymunedau tuag at siopau lleol, ac wrth i helyntion ynghylch archfarchnadoedd feddiannu’r cyfryngau’r wythnos hon dyma ambell stori am fentergarwch a dyfalbarhad ein busnesau bychain…
Bwyty a lleoliad bendigedig newydd yn agor yng Nghaernarfon
Cefndir bwyty newydd y dref, Yr Hen Lys
Addasu i’r normal newydd yn Poblado Coffi.
Agor caffi awyr agored yn Poblado coffi, i ail-gysylltu hefo pawb ar ol y clo mawr.
Bwyty Hwngaraidd newydd yn Aberystwyth
Am y tro cyntaf erioed, mae gan Aberystwyth gaffi Hwngaraidd, sydd a blas newydd gwahanol.
3. Hanes yr ysgolion
Ers i ysgolion ailagor mae nifer o gyfranogwyr Bro360 wedi bod wrthi’n cofnodi gweithgareddau eu hysgolion, o gasglu arian i greu fideos am dafodiaith leol, o ddiolch i deuluoedd y pentre’ i ganu caneuon sioe cerdd.
2020: Blwyddyn hesb, heb fawr ddim i’w drafod, dathlu na’i gofnodi?
Codi arian, mwynhau natur, a busnesau’n arloesi: straeon sy’n profi bod bwrlwm o hyd yn ein bröydd
Sêr Ysgol Mynach
Disgyblion Ysgol Mynach yn perfformio’r gân Gymraeg ‘Dyma Fi’ allan o ‘The Greatest Showman’
4. O un sesiwn Zoom i’r nesa’
Yn absenoldeb cael cyfarfod ag eraill wyneb yn wyneb, rhedodd sawl cymdeithas, côr, gŵyl a sioe i freichiau agored Zoom.
O gyfarfodydd llenyddol i eisteddfodau, o sioeau amaethyddol i wyliau cerddorol, cynigiodd y byd digidol achubiaeth fechan i’r celfyddydau a’n ffordd o fyw.
Rhaglen o gigiau mawr yn dod i Neuadd Ogwen
Edrychiad ar gig I Fight Lions a Candelas a’r gigiau arall i ddod
Sioe Ddigidol C.Ff.I. Llanllwni 2020
Canlyniadau’r sioe arbennig a gynhaliwyd ar Ddydd Llun Gŵyl y Banc.
Gŵyl Fwyd yn paratoi arlwy o ddigwyddiadau digidol
Manylion digwyddiadau digidol Gŵyl Fwyd Caernarfon
5. Profiadau pobol
Mae gan bawb eu stori eu hunain.
Mae pobol, busnesau a mudiadau lleol wedi wynebu heriau o bob math yn sgil y pandemig, ac wedi llwyddo i ymdopi’n rhyfeddol â’r newidiadau. Bu ambell un o’n cyfranwyr wrthi’n ysgrifennu am eu profiadau, o blismona’r rheilffyrdd yn Arfon, i ddysgu Arwyddiaith i eraill yng Ngheredigion.
Cyfle i ddysgu Arwyddiaith dros yr haf
Gydag amser ar ei dwylo, mae Briallt yn fodlon cynnig help llaw.
Plismona’r rheilffyrdd yn ystod y Cyfnod Clo
Fy mhrofiad i o blismona rheilffyrdd gogledd Cymru yn ystod y 6 mis diwethaf
6. ‘Lle awn ni am dro heddiw?’
Dwi’n siŵr i’r cwestiwn yma gael ei ofyn yn feunyddiol ym mhob cartre’ yn ystod y Cyfnod Clo cynta’. Denwyd nifer ohonom i ailgynefino, darganfod llwybrau newydd ar ein stepen drws a rhyfeddu at natur mewn ffordd na wnaethom o’r blaen.
Cofnodwyd amryw o straeon am natur, a’r byd tu hwnt i’n pedair wal, ar y gwefannau bro dros y misoedd dwytha’…
Plwyf tecaf y plwyfi
Braint fawr yw cael byw mewn plwyf mor fendigedig â phlwyf Ceulan a Maesmawr ond mae sefydliadau mawr wedi godro’r plwyf yn ddidrugaredd ar hyd y blynyddoedd.
Gardd newydd pentref Silian yn rhoi hwb i fyd natur
Creu gardd pili pala ar ddarn o dir ‘y triongl’ o flaen yr hen Eglwys.
7. Help llaw
Os nad oes dim oll arall wedi dod i’r amlwg yn sgil y pandemig, yna haelioni’r gymuned yw hynny. Yn nyddiau cynnar y Cyfnod Clo daeth cymunedau ar hyd a lled y wlad at ei gilydd i ddarparu bwyd, clust a chymorth i’r bregus.
Pecynau Bwyd am ddim gan Cofis Curo Corona
Cofis Curo Corona yn cynnig cymorth i drigolion Caernarfon yn sgil cofid-19.
Seren Gerddorol Ryngwladol Cymru yn aros gartref i helpu’r gymuned
…gyflwyno rhwydwaith cynnyrch lleol yn ardal Dyffryn Ogwen, Cadwyn Ogwen
“Y cyfnod yma yn dangos gwir werth mewn dynoliaeth a chymdeithas”
Wynne Williams o Ddinas Dinlle yn diolch am gefnogaeth pobol leol i rheini sy’n hunan ynysu.
8. Rhannu hanes lleol
Does ‘na neb yn ‘nabod hanes eich bro cystal â thrigolion yr ardal.
Yn ddiweddar, mae nifer wedi manteisio ar eu gwefan fro i gofnodi hanesion lleol, o ddarpariaeth merched mewn gofal iechyd, i atgofion am Eisteddfodau a fu.
Ai hanes eich ardal chi fydd nesa’?
Cofio Merched y Broydd Llechi: Gofal Iechyd ar yr Aelwyd Chwarelyddol
Gofalu am gleifion ar aelwydydd chwarelyddol.
2020: Blwyddyn hesb, heb fawr ddim i’w drafod, dathlu na’i gofnodi?
Codi arian, mwynhau natur, a busnesau’n arloesi: straeon sy’n profi bod bwrlwm o hyd yn ein bröydd
9. Chwaraeon
Pan laciwyd rywfaint ar gyfyngiadau’r coronafeirws llwyddodd nifer o dimau chwaraeon i ailgydio mewn ymarferion.
Manteisiodd ambell un o ohebwyr lleol y gwefannau bro ar y sefyllfa, a mynd ati i gofnodi hynt a helynt eu timau lleol…
10. Llyfrau, llyfrau, llyfrau
Teg tybio bod nifer ohonom wedi ailgydio mewn llyfr yn ystod y cyfnod clo byr ‘ma, a bod llawer ohonom wedi dianc i’r byd rhwng tudalennau ein hoff nofel eleni.
O nofelau newydd i sefydlu clybiau darllen newydd, mae bwrlwm llenyddol eich bro wedi’i gofnodi ar y 7 gwefan.
Nofel awdur o Geredigion am Blas Nanteos
Awdur o Geredigion, Jane Blank, yn cyhoeddi dilyniant i’w nofel am Blas Nanteos – The Dipping Pool
Clwb Darllen Dyffryn Ogwen
‘Llyfr y Mis’ yn cael ei lansio, gyda’r gobaith o godi gwen i ddarllenwyr y dyffryn.
Recordio hanes Tîm Pêl-droed Dynamo Cwmann
Nofel Gary Slaymaker ‘Y Sach Winwns’ ar gael fel Llyfr Llafar i roi gwên ar wyneb cyn diwedd yr haf.
Dyma ambell enghraifft ymhlith nifer fawr iawn o straeon sydd wedi eu cyhoeddi ar y 7 gwefan dros y misoedd dwytha’. Ceir adroddiadau gan Gynghorau Cymuned, ambell rysáit difyr, darnau barn a llawer iawn mwy ar wefannau Bro360. Porwch, darllenwch a mwynhewch yr arlwy.
Beth fydd y stori nesa’?
Pwy fydd nesa’ i gyfrannu at eu gwefan fro?
Cofiwch y gallwch chithau rannu eich stori – mae’r gwefannau yn blatfform i bawb sy’n byw yn lleol.
Pa stori fydd yn mynd â’ch bryd chi?