Nid fi yw hwn
Er mwyn gadael sylw, mae angen mewngofnodi neu ymuno â’r safle.
gan
Lowri Jones
Ydych chi’n aelod o gôr neu barti llefaru, canu neu ddawns yng Ngheredigion?
Rhowch w’bod trwy gyfrannu at y blog byw yma heddiw.
Gyda heddiw’n dynodi 100 diwrnod i fynd tan i Geredigion groesawu’r Eisteddfod Genedlaethol, rydym am fapio’r criwiau creadigol sy’n cwrdd erbyn hyn.
Nid yn unig mae’n gyfle i weld realiti’r sefyllfa wrth i ni ddod mas o’r pandemig, ond gallai’r wybodaeth droi’n fap llawn corau a phartïon fydd yn denu aelodau newydd i ymuno â chi, er mwyn cymryd rhan yn y brifwyl!
Mae ychwanegu sylw isod yn hawdd:
– Mewngofnodwch/Ymunwch â’r wefan
– Pwyswch y botwm ‘ychwanegu diweddariad’ isod.
Ymarfer yn yr awyr iach
Ymarfer cyntaf 2022
Na, nid y wanted list ond ymdrechion Movember.
Meibion y Mynydd
Wedi seibiant o ddwy flynedd mae bois Meibion y Mynydd yn falch iawn o fod nôl gyda’i gilydd yn ymarfer a braf yw cael cyngherddau a digwyddiadau I baratoi ar eu cyfer.
Doedd zoom ddim yn rhywbeth oedd yn apelio at y côr o ran trïo cynnal ymarferion, er cafwyd sawl noson gwis drosto fel bod pawb yn medru gweld ei gilydd a chymdeithasu yn ystod y cyfnod clo.
Gan fod codi arian at elusennau yn rhywbeth pwysig iawn i ni fel côr, penderfynwyd ymuno ag ymgyrch Movember a chodwyd arian at prostate cancer. Doedd Covid a chyfnod clo ddim yn mynd i rwystro’r bois rhag tyfu mwstas a chodi arian at achos sydd yn effeithio gymaint o ddynion ar hyd a lled y wlad.
Er i ni drio ailgydio yn yr ymarferion nôl yn nhymor yr Hydref, fe ddaeth Covid ar ein traws a gorfod i ni wneud y penderfyniad o adael ymarferion tan 2022.
Ond, ni nôl ac yn wedi croesawu aelodau newydd i’n plith sydd yn arwydd o’r angen i gymdeithasu a dod nôl i ryw fath o normalrwydd.
Bach o sioc yw trïo cofio alawon a geiriau wedi cymaint o seibiant, ond mae’r ffaith bod gennym ddigwyddiadau i anelu atynt yn hwb i bawb.
Edrychwn ymlaen at gyngerdd yn neuadd y Celfyddydau ym mis Mehefin ac mae’r paratoadau wedi cychwyn ar gyfer ein cyngerdd Dathlu Deg sydd ymlaen ym mis Hydref.
Cofiwch, os chi chwant ymuno a chriw o fois hwylus a chymdeithasol iawn yna rydym yn ymarfer yn neuadd Ponterwyd a Chapel Seion, am yn ail wythnos ar nos Sul.
Canu tu fas Cartrefi Gofal yr ardal yn ystod y Pandemig.
Ymarfer côr yn ystod y Pandemig
Côr Merched Soar.
Côr o ferched sy’n cwrdd bob yn ail nos Fawrth yn Festri Bwlchgwynt, Tregaron.
Ry’ ni’n canu pethau poblogaidd, alawon gwerin, pethau traddodiadol ac wedi rhoi shot ar gerdd dant hefyd!!
Rydyn ni wedi diddanu mewn digwyddiadau amrywiol yn y gymuned, cystadlu mewn eisteddfodau (lleol a chenedlaethol) ac wedi cynnal cyngerdd hefyd.
Dros y pandemig, parhaodd y côr i gwrdd tu fas (ym maes parcio Tregaron) a buon ni’n canu tu fas cartrefi gofal yr ardal.
Rydyn ni’n paratoi ar gyfer yr Eisteddfod Genedlaethol ar hyn o bryd ac yn gyffrous iawn!
Mae Bytholwyrdd nôl!
Ar ôl dros ddwy flynedd o ddistawrwydd daeth aelodau Côr Bytholwyrdd (Côr i gantorion dros 60 oed) yn ôl at ei gilydd wythnos d’wetha yng Nghapel Brondeifi, Llanbed’ gyda’r bwriad o gystadlu yn yr Eisteddfod Genedlaethol eleni. Mae croeso i aelodau newydd o hyd – yr unig gymhwyster yw bod yn 60 oed neu trosodd, a mwynhau canu.
Cynhelir yr ymarfer nesa bnawn Sul, Ebrill 24 am 2 pm ym Mrondeifi ac yna nos Fawrth Mai 3/10/17/24 7-8.30 p.m. Dewch I ganu!